Mauloffer Anekdoten

Die vorliegende Sammlung von Mauloffer Anekdoten hat meine Frau, Adelheid Natus, verfasst und trotz schwerster Krankheit kurz vor ihrem Tod in der originalen Lokalsprache auf Tonträger gesprochen. Sie wollte der bäuerlichen Kultur ihres geliebten Heimatdorfes ein Denkmal setzen.

(Bite Copyright beachten: Alle Rechte bei www.baumbloghaus.de)

Die Zeit ist ihren Weg gegangen,

doch wurde LEBEN eingefangen

und für die Nachwelt uns bewahrt

durch Anekdoten dieser Art.

Sie können uns so manches lehren,

kennzeichnen Menschen, die wir ehren,

besonders dann, wenn wir uns trauen,

den Leuten auf das "Maul" zu schauen.

Ein kleines "Nest" in Hessen nur,

doch typisch für die Dorfkultur,

ist MAULOFF in dem "Stillen Tal"

mit seinen Menschen allemal.

Berichtet wird im Dialekt,

wieviel Humor im Alltag steckt:

Als erstes - in memoriam -

hört, wie der Ort zum Namen kam.

 Dieter Natus

Usser Dorf es jo schun oajg aalt, owwer weils su obgelee-e es, hatts freuer  nit emool en Noome. Owwer daa hott de Ferschd Geld gebrauchd unn hott festgeschdelld, dess die Leud en usserm Ord goar kaa Schdeuern bezoale dere, weils des Ort en seine Lisde goar nit goob, unn das kunnt joa nit gieh! Do horre aan bei de Bermoasder geschiggt, der sellt dem Ort en Noome gewwe.

De Bermoasder hott iwwerleet unn iwwerleet, unn alsemol horre aach sei Fraa gefreet, wann e gedoochd hott, e hätt en schiine Noome gefunne. Owwer die Korline hot jedes Mol gemeent, die Leut voom Ort härre was droo aussesedze, unn se wusst aach jedes Mool schunn, was, unn se hatt aach reescht. De Ferschd hatt dem Bermoasder e Frist gesedzd, e mussd baal en Noome wesse.

En de hiegste Nuut es dem Bermoasder engefalle, e kinnt doch die Leut selwer entscheire losse, unn doo horre se all off de Samsdoach Oowend offs Roares beschdelle losse. Doas woar die Schulschdubb iwwerm Backes, unn de samsdoachs owends woarsch do schieh worm, wesche dem Backe. Wej se daa doo all beisumme woarn, doo hott de Bermoasder erklärd, se missde Veerschläsch mache ferren Noome ferr des Ort. Was goobs doo all ferr schiene Noome! Owwer es goob kaan, derene

allmenanner gefalle hätt. Wejs daa als noch gedauerd hott, unn die aane hunn su geruffe unn die annern su,  doo hott de Bermoasder gekresche: “Ihr Leut, horschd emol! Suu kumme mer nit weirer. Wer jedzd des negsde Wort säät, den Noome krejt es Ort.”

Eweil owwer! Su laut wejs verheer gewäse woar, su leise woarsch jedzd. Merr kunnt die Mäus em Fachwerk renne herrn.Kaans hott mih was geschwedzd. Se harre all Engsd, die annern dere se hennenooch schenne odder auslache. Hej unn do hott alsemol aans veschdohle gegehnt, owwer se hunn schdell  beinanner gesodze unn gewoart, des e annersch was saa deht. Es woor schunn ganz schii schbeet, unn de Bermoasder wollt hamm unn die Leut aach.

De Bermoasder wollt die Leut anemiern, se sellde ebbes saa, unn do esse offgeschdonne unn hott gesaat: “Machts Maul off, Ihr Leut!” Suu häsd des Ort heut noch!

Merr sinn jedzd em veerische Joarhunnert, wuu, ess egal. Es kinnt iwwerall gewäse sei, daa iwwerall gibt’s unn goobs aach doomols junge Leut unn Mussig unn vill Temberament. Manch aaner waaß bess heut nit, desse sei Entschdee-ung suu em Ereischnis se vedangge hot. Es goob kaa Pille, kaa Verhüderli, kaa Schbirale – nix! Die junge Marrerscher mussde oachtgewwe, desse sisch unn ihr Borsch nit zou weit hunn gieh losse.

Das musst aach die Edeltraut. Wann dej owwer danze ging, hunn aach noch ihr Ellern unn siwwe Dande unn Onggel Obacht gewwe, desse nit lenger wej fünf Minude off de Aabee gange ess, dess noor joa nix bassiern sollt. Wanns noor e wink lenger gedauert hot, es aans voo dene enaus unn hot noocher geguckt. Owwer aamool, oo Fassenoacht, doo woar Mussig enn de Wertschaft, unn die Edeltraut hatt sisch als Haaremensch veklaadt. Doas hot gout bei se gebasst, daa es woar e gleunisch Mensch. No, se hatt aach baal de bassende Zigeuner gefunne, unn es woarn aach noch annern Haaremenscher unn Zigeuner doo. Do hot die Verwandtschaft schdolz die Edeltraut met de annern veglische: Die Edeltraut woar die Schienst!

Wejs de Deiwel owwer wollt – off aamool woar die Edeltraut fort, unn ihrn Zigeuner aach, unn se sinn unn sinn nit werrekumme. Kaaner voo ihrne drei Onggel unn vier Dande kunnt se finne, unn aach ihr Ellern nit. Wej se daa endlisch werrekoom, hot se gesaat, se wer nooch dem Aabee drauß gewäse, zoum Obkeule.

Drei Monat schbeeder hot e Nochberschen zou dem Madsche seiner Modder gemeent: „No, euer Edeltraut gieht alleweil off wej en Krebbel!“ „Joa, es schmeckter halt gout!“ woar die Antwort. Nochemool zwaa Monat schbeeder woar Velowung unn daa hot des Offgeboot emm Kasde gehongge. Dieselb Nochberschen hot geschdischelt: „No, Eurer Edeltraut ihrn Abbedit hatt joa en goure Grund. Se muss joa aach ferr zwaa esse! Doas koom voo de Fassenoacht!“ „Joa,“ hot die Brautmodder lammediert, „annern Marrerscher – immer! Usser Edeltraut aamool – bätsch!“ 

Woas isch eusch jedzd vezehle, doas es zou ener Zeid bassierd, wu die Leut nit nor en Daal voo de Azzenei selwer bezoahle mussde; naa, aach dej Visidde voo de Dockdern mussde se aus ihrm ajene Seggel berabbe. Es goob nehmlisch noch kaa Krangekasse. Do es de Dockder nor geruffe woarn, wann werglisch Nuut oom Mann woar. Su woarsch aach beim Scholze Heinrich.

Voo seim Fuffzischste oo horre als immer e wink gejaunert: Es weerem nit gout, unn des Herz  wellt nit mih su reecht, unn e misst gewess baal schdeerwee Es woar jo aach schunn veerheer immer emol aans krank worn en seiner Famillje, unn wanns goar se lang gedauert hatt, do harre se aach als schunn de Dockder geholld.

No, unn wejs aamool ganz oajk woar, do hunnse enunner nochem Denn dellefoniern losse, de Dockder meecht doch emool eroff kumme, de Heinerich weer su schleecht. Doomools goobs nor ganz selde emol e Audo. Was woar das ferr e Offreeeschung em Ort, wej do de Dockder met suu em neumodische Woache ohne en Gaul deverr beim Heinerisch verrm Häusje gehalle hot, unn die Kenn unn die Gruse koome all ebei unn wollde wesse, wej daa su e Deiwelszeusch ohne en Gaul odder wenischsdens e Kou odder en Esel odder e Gaaß odder en Hund deveer iwwerhaabt foahrn kinnt. Owwer de Dockder wollt obselut nit iwwer den Woache schwedze. E hoddene Gedach gesaat, daa esse meddeme ernsde Gesischt en de Hitt veschwunne, unn daa hotts gedauert. Doo hot doch de aa odder anner die Schdern gerunzeld unn hot iwwerleet, was e alles dou misst, wann de Heinerich jetzt baal schdeerwe deht, oogefange beim Lochmache offem Kerschoop bess zoum See-e unn Ernde helfe weesche deere oarme Fraa unn deene klaane Kenn, dej all noch nit konfemierd woarn.

Wej de Herr Dockder noo ner halwe Stunn werre eraus koom, doo hodden aaner gefreet, wejs da meddem Heinerisch ging, unn de Dockder hot gemeent, es weer nit suu aafach met dere Geschischd, owwer e deht en werre en die Rei kreje, wann der Kranke nor sei Arzenei nehmen deht.Un voo deem Aacheblick oo hodden sei ganz Familie geschuunt unn bedoddelt unn gemoacht unn gedou was se noor kunnde, desse noor jo ihrn Baabe noch ewink behalle dehre. Die Luwies hot gleich die Lina fortgeschickt nooch Koomersch enn die Abbedeek, unn die Lina durft noch bes offs Denn metfoarn en deem qualmische Deiwelsding, unn voo doo aus musstse weirer laafe nooch Koomersch unn die Azzenei kaafe un werre serick. De Heinerich hot broaf sei Azzenei genumme unn e ess aach wergelisch besser worrn. Bess off de ledzde Trobbe horre alles ausgesuggelt. Unn wej e die aa Flasch all hatt, doo horre gemeent, es weer villeischd ganz goud, wann e en Zukunft e wink mih Oobacht basse deht off sei Gesundheit. Owwer dej Visitt voom Dockder unn dej Azzenei woarn owwer aach ganz schii deuer gewäst, unn de Heinerich woar e Kneerzje. Doo horre erscht emol em Kische- schrank geguckt, was doo noch alles erimmgestonne hot voo seim Vodder, unn doo horre zou seine Kenn gesaat: “Mer muss das deuer Zeusch jo nit immkumme losse!”

Die Lina hot en de Schul bei de Ewwerschde  deverrnerrscht gesesse unn hot gemeent, de Baabe hätts doch oom Herz, owwer off de Flasch deht doch schdih “Zum Abführen”. Owwer de Heinerisch wollt obselut schboarn unn hot ganz biis gesaat: “Willsde daa dein Vodder inner die Eerd brenge? Eich werrn das jetzt ennumme. Batts daa nix, daa schodds aach nix!”

Die Lina woar lejwer rowisch, unn de Heinerisch hot voo doo oo alles verr sei Gesundheid gedoo, was nit deuer woar. Erschd horre des ganz Gefach leer gemoacht, was voo seim Vodder woar, nochheer horre weirergemoacht bei seiner Modder ihrer Schubbload. Doodenooch horre des ganze Häusje inschbizzierd unn aach als immer noch was gefunne. Aan biise Nochber hot behaapt, de Heinerisch het sugoar alles allgemoacht, was de Vejdockter dogelosse hätt - wer waaß?

Jedenfalls - ihr werds villeischd nit glaawe, owwer es es werklisch woar: Es muss was gebatt huu, daa de Heinerisch met seim krange Herz ess vierunneunzisch Joar aalt worrn!

Die Lisett hott als gern gebodzd, unn des Mariesche hott lejwer e wink geschwedzd.

Des Mariesche hatt werre emol ihr ganz waasch Sofakisse ens Fenster geleet und hot sich droff geschdizd un hot die Neuschur engenumme.Die Lissett voo geesche-iwwer hot neemlisch werrre emool ihr Fenster gebotzt.Weil die Lisett alle vier Woche oo ihr Fenster gange es, doo goobs      

schbeedesdens alle ochdenzwanzisch Doach was se schwedze, unn wann aach de Wend noch suu oajk gepeffe hot. Es woar Freujoar, unn die Lissett hot sisch geeilt, weil die Eerwet baal oogonge es, unn doo hot se sisch oom Holme de Kopp oogerennt, unn se hatt aach gleich en blitzebloae Plagge em Gesischt. Dem Mariesche hot die Lissett laad gedoo, unn doo hots gesaat: “Mir bassierd das aach als emool, owwer das giht aach baal werre ewick. Lee der doch en nasse Labbe off die Schdern!”

“Ach was!” hot doo die Lissett gesaat. “Was glaabsde daa, wej aich aussiehn, wann jedzd die Eerwet em Goarde baal werre oogieht! Es ledzd Joar hot mein Emmil misch baal nimmie gekennt!”

“Ei woarim daa?” hot des Mariesche gefreet.

“Ei jedes Moal, wann isch en de Poad gedreare hunn, da sein aisch off dej Zingge voo deem Koarscht gedabbd, unn jedes Moal horre merr werrre de Kobb geklobbt. Der laadse Koarscht!” 

Es woar freuer, wej die Weibsleud noch ihr Kenn dehamm krejt hunn, unn die Hebamm musst en Rillbach gehollt werrn, unn doo musde die Mannsleut hielaafe unn Beschaad saa, unn daa sinnse werre medde Hebamm hammkumme, bei jedem Werre, aach em dicksde Wender.

Do woar en Mauloff e Fraa en annern Immschdenn, unn enn Finsderndoal aach. Nou werder  saa, doas bassiert doch alle Doach iwwerall off de Weld, dess Kenn geboarn wern. Owwer dessmoal woars was Besunnersch. Eerschdens, weil Kriesch woar unn de Kendsvodder ess iwwer Noachd ausem Heimaturlaab oo die Front geruffe woarn, unn doo hot sei Fraa sisch suu offgereescht, dess des klaa Kend iwwer e Woch se freu koom; zwaadens, weil die Mäuloffer Fraa vierunzwansisch Schdunn woarde musst, bess die Hebamm dorsch de huuche Schnie ebeigelaafe koom, daa se woar veerheer schunn nooch Finsderndoal geruffe woarn, do musd se erscht noch e anner Bobbelsche holle, unn daa esse voo doo nooch Mauloff  gelaafe,  unn doodenooch durft dej Mäuloffer Fraa ihr Kend off die Welt brenge;  dreddens woar oo dere Geschischd woas Besunnersch, weil en Kunfemand woas fers Läwe gelernt hott.

Unn aa Goures hatt die Geschichd aach noch: De Vodder voo dem Mäuloffer Bobbelsche hot sein Heimaturlaab nochemool im aa Woch verlengert krejt, weil se des Klaa nutdaafe wollde.

Siwwe Peddern unn Geere harre se sesumme krejt. Voo dene woar aaner noch em Kriesch, owwer schdodd seiner sollt sein Broure des Kend iwwer die Daafschoal halle.

Die annern voo auserhalb wollde all nit kumme, weil de Schnie su huuch gelee-e hot. Noor de Parre musst. Unn desse nit suu schwer se schlebbe hat oo dem ganze Daafgescherr unn annern Kroom, horre en Kunfemand voo Fischbach mettgenumme, der musd des Daafgescherr traa, unn de Parre hatt sein Talar mem Beffsche unn de Wai em Rucksack. Suu sinnse dorsch de Schnie geschdabschd, voo Fischbach de Schduusert enoff unn enunner offs Denn, unn werre beargoff oom Forschdhaus vebei unn als weirer. De Parre als vornewick unn de Oddo hennerdrenn, daa e woar zou klaa geroare als desse bei dem sibbzisch Zentimeder huhe Schniee hätt Boo mache kunne. Owwer e hott sisch tapfer gehalle. Noor oom Vuchelskerschbeemsche hott de Wend suu gepeffe, desse em lejbsde werrre erimmgedreet weer. Owwer de Parre hott gesaat, alleweil weern se joa schunn annerthalb Schdunn innerweegs, se deere joa doch aach des Ort schunn lei-e sieh -  unn weirer gings! De Oddo hatt en Brass off de Parre, owwer aach off sisch selwer, desse als aanzischer joa gesaat hat, wej de Parre en de Kunfemandeschdunn gefreet hatt, ob em aaner helfe kinnt.

Endlisch sinn se de Kerschweeg enunner unn voo henneheer oos Ort kumme. Aach doomols schunn woar geesche-iwwer voo Christians en huuche Resch. Owwe off de Kant ess de Parre gedabbt, unn hennerdrenn als des Oddoosche. Off aamool ess de Parre ausgeritscht. Weil owwer groad doo e ganz huuch Schniewieh woar, esse owwe enn de huuche Schnie enenn unn unne drinner dorsch, dess de Oddo en en Aacheblick goar nit mieh gesieh hott. Off aamool koom de Parre  unne werre eraus, unn hott nooch Luft geschnabbt unn woar runderim voll Schnie. Des Oddosche hot nooch dem Parre geguckt, ess en sei Foußdabsche geschdische unn - wutsch - hennerdrenn: Owwe enenn zou deere Heel, dej de Parre gemoacht hatt, unn unne werre eraus. De klaa Oddo musd lache, weil suu aaner Reschbegtsperson suu ebbes Dabbisches bassiert woar, unn ihm selwer gleisch denooch aach nochemool. De Parre hot e bies Gesischd krejt, wej e de Oddo hott lache sieh. E hott sisch e wink de Schnieoabgeklobbd, unn batsch - batsch hatt de Kunfemand e poar gefange, eher wej desse sisch imgugge kunnt. E hatt noch nitemool Zeit gehott, sisch se dugge. Doodenooch gings gleisch weirer, off die Kenndaaf. Dem Oddo sei Mamme hatt gesaat, doo geebs Plätzerscher unn Kuche unn villeischd suugoar Kakau. Owwer voo dem allem hott de Oddo nix oabkrejt. E hott noor noch e runzelisch Bobbelsche gesieh, daa sinnem en deere woarme Schdubb voo dem ville Schnieschdabsche die Aache zougefalle, unn doo hunnsen offs Kannebee geleet, unn des Oddosche hott die ganz Zeremenie unn die Plätzerscher unn de Kakau unn de Kuche veschloofe. Wejs daa oos Hammgieh ging, hunnsen werre geweckt unn hunnem noch e wink Kuche beis Daafgescherr gepackt, unn daa sinn dej zwaa werrre hamm, de Parre vornewick, des Oddosche hennerdrenn, unn jetzt woar de ucksack noch schweerer! Es ging joa jedzd  baal nur noch beargobb, doas woar besser wej verheer. Do hunn se hammzous noor noch aaneverdel Schdunn gebraucht.

Aan bleiwende Enndrugg hott die ganz Duur owwer doch noch hennerlosse: De neegsde Sunndoach nooch de Preärischd wusd ganz Fischbach, woas ferr e Hilf de Oddo em Parre gewäse woar. Sei fromm Geet hodden do schdolz gefreet: “No, Oddo, dou hosd bei deere Duur doch sischer aach woas gelernt, woas de fers Läwe brauche kannst?”  “Ei joa,” hotts Oddosche doo gesaat, “dess mer sisch beizeit dugge muss, wann werrre emool en Dumme gesucht werd.”

Nooch em Kriesch kunnt merr en Mauloff hiegsdens Läwensmiddel kaafe, bei de Kreeda, unn das woarsch. Wann die Leut was zoum Oodou gebraucht hunn, musde se mem Milschaudo nooch Usinge odder veer Weihnochde mem Bus nooch Koomersch. Do hunn die Koomerscher Geschäftsleut extroa en Bus laafe losse. Odder se musde off de Landschdaa laafe unn vo do aus weirer mem Bus nooch Frankford foarn, unn do ging en ganze Doach droff. Owwer do goabs noch des Frankforder Mennsche. Das woar en Rimdreher, der meddem Foarroad unn em gruuse Koffer innerwegs woar unn off de Erder Zeusch vekaaft hot.

Es woar emol en schiine Doach em Herbst, die Sunn hott gescheint,  die Feldeerwet woar gedoo, unn de Rischadd unn des Jeddsche wollde Welle mache foarn. Die Keu woarn schunn vern Woache geschbannd, do koom groad des Frankforder Mennsche enn de Hoob enenn unn hatt sein Koffer offem Foarroad unn hott gefreet, ob se nit Knepp bräuchde odder Zwern odder Strumpfbänner. Des Jeddsche wollt nix hu. Do hott des Frankforder  Mennsche gesaat, es hätt su schiene Innerrregg dodrenn, se selld doch emool gugge. “Joo”, hott doo des Jeddsche gemeent, unn iwwern Rischadd, e selld noch e wink woarde, se welld emool sieh, was es Frankforder Mennsche hätt. Doo hott de Rischadd geknorrt, es misst owwer schnell gieh, e däht nor noch e anner Ax holle. Daa es die Emmile kumme unn hott noch Knepp gefreet unn was des Nehgoarn kosde däht unn die Adelheid kunnt nix kaafe, owwer se hott nooch de Schbizedaschedischer geguggt unn die Hilde nooch de Perlonschdrimp met unn ohne Noht, unn des Jeddsche hott sich ganz genau die zwaa Innerreck betroacht, dej des Frankforder Mennsche debei hatt. Des Jeddsche kunnt joa nit aafach en Mauloff  bei die Kreeda gih unn en Innerrogg kaafe, su was gobs nit bei de Kreda.. Unn do hunn jedzd dej zwaa Innerreck gele-e, aaner schiiner wej de anner! De aa woar lindgrün - e ganz neu, modern Foarb, hott des Frankforder Mennsche gesaat. Owwer e woar aus Baamwoll unn enwennisch oogeraut, unn nooch de eerschde Wäsch härre geweß nimmih su gout ausgesieh wej vo Neuerheit. Se hätt owwer en neue woarme Innerrock ganz gout brauche kunne ferr de Wender, der jo noch kumme sollt. De anner hott dem Jeddsche mih en de Noas gestogge, owwer e woar e ganz Schdigg deurer, daa e woar lachsfarben unn Schameeß!  Des Frankforder Mennsche hott gedou als wej wann Schameeß noch moderner  wer wej lindgrün unn als wej wann die Weibsleut enn Frankford allmenanner nor noch dene Schameeß

Innereck hennerher wern. Owwer enn Frankford esses aach em Wender nit su kaalt woarn wej en Mauloff. Des Jeddsche hott als unn als iwwerleet, ob se de lindgrüne baamwollene oogeraude Innerrogg numme sollt odder de hochmoderne lachsfarbene Schameeß. Se hott aach gedoocht, de Rimdreher dät er villeischd noch e wink Geld noochlosse, wann sej selwer noch e wink woarde dät. No, de Rischadd hatt schunn die Ax of de Woache geworfe, die Emmile hot e Roll Zwern genumme unn die Hilde hot ihr Geld voom Dännerschersedze beigehollt unn sich e Poar Perlonschdrimp gekaaft, owwer des Jeddsche kunnt sisch nit entschlejse. De Rischadd hott geschennt, se sellt verro mache, se keeme jedzd nit en de Waald unn verr Dunggelwerrn nit werre hamm.

Off aamool hot die aa Kou de Kopp gedreht unn hot met ihre raue Zung nooch dem Seidebabier gelangt, wos des Frankforder Mennsche enn de Hand gehalle hott, unn wuu de Schameeß Innerrock

droffgelee-e hott, unn se hotts aach krejt! Uijeh! Se hatt mir nix dir nix des Babier veschluggt unn hott als noch weirer geleckt. Baal hätt se aach noch de schiene deuerne lachsfarbene Schameeß Innerrock gepackt! Alleweil owwer! Su schnell hosde nit geguggt, do hatt des Frankforder Mennsche de lachsfarbene Schameeß unn aach de lindgrüne baamwollene Innerrogg enn sein Koffer gebaaft unn die Gummilidze unn Hooge met Eese unn Druckknepp unn Wescheknepp unn Hoseknepp unn wer waaß noch was all unn hatt sein Koffer aach schunn zou unn festgeschnalld. Es hott sei Foarroad schunn fortgeschuubt unn debei gesaat, es deht e annermool werrrekumme, wanns met de Eerwet nit su bressiern dät. Die Hilde essem noch  noochgerennt unn kunndem groad noch des Geld fer die Perlonschdrimp enn die Hand drigge, do woare aach schunn ausem Hoop enaus. Die Emmile hot gesaat; “Das es mer noch em Läwe nit verkumme, dess en Rimdree-er sei Geld nit hu wollt! Aich gewwes em e annermol.” Des Jeddsche owwer braucht jedzd nimmie se iwwerlee-e, alle zwaa Innerreck woarn fort. Se kunnt kaan mih kaafe, es woar groad  wej wann die Kou de Innerrock gefresse hätt - e woar nimmie do! Se musd em Wender vereerschd emool en Jack mih oodou, besse werre emol fortkeem.

De Rischadd hott sisch gefreud, weil e schunn e wink Ängsd gehott hatt, dess die Kou villeischt des Schameeß Zeusch nit vetrah hätt, wann ses da krejt hätt, unn da härre de Vejdockder holle misse, unn der hätt Geld gekosd. E hott sisch owwer noch mieh gefreud, weil e jedzd nimmie se woarde braucht, woas fer en Innerrock des Jeddsche numme deht. Die Kou hatt dem Jeddsche die  schwer Entscheidung jo obgenumme.

“No, Klaanesje,” hott de Rischadd iwwer die Kou gesaat, wann werre mol su e schwer Entscheidung  us offhalle will, daa holl isch disch gleisch ebei, daa kannsde des Problem fresse!”

Die Emma unn de Eerisch enn Hennermwaald harre sisch biis geploocht unn harre met Meu unn vill Eerwet e Wertschaft offgemoacht unn noochheer als unn als oogebaut ferr dej ville Frankforter, dej oom Wocheend  en de Taunus wollde, unn  wej se endlisch aus em Grebste eraus woarn, doo woarn se nadierlisch oowends immer ordentlisch meud. Se harre gout Kundschafd, owwer dej Herrschafde, dej merr iwwerall schbeetoowends oo de Theke find, dej harre se aach, unn doo mussde se als do sitze unn woarde, bes dej Kunne hamgange sinn, un das hodd geweenlisch gedauert.

Do woar werre mol su en Oowend, wuu dej Kerle als nit fort wollde, unn gedou hunn als wej wann se bei de Emma unn dem Eerisch dehamm wern. De Emma sinn die Aache baal zougefalle, su meud wooarsche, unn se musd doch de annern Moaind werre eraus. De Eerisch hadd sisch schunn haamlisch verdriggt, unn wej die Emma gewohre worn es, des de Eerisch als nit ebeikoom med dere Flasch Korn ausem Keller, wuu e veschbroche hatt se brenge, do es der de Emma de Kamm geschwolle, daa se hodd nit engesieh des se dej Babbeler elaa innerhalde solld. Unn vill beschdelld harre se aach nit mih, se woarn neemlisch schunn voll wej en Krobbe unn hunn nor noch schleeschd geschwädzt.

Wejs do als nit viero gie wollt meddem Hammgieh, do hodd die Emma gesaat: “Wos es daa med eusch luus heud Oowend? Hodd er kaa Bedder nit?”  Das hot gewerkt. Se sinn all hamm - owwer des Werrekumme, das hunnse bes heud vegesse.

De Hannjer enn Owwernassbach hadds immer e wink schwer mem Bezoale. Unn aamool, wej e sisch werre emol Geld geliehnt hatt, do horrem sein Schwoacher gesaad, er sellds em owwer beizeit werre gewwe. No, es hodd gedauerd unn hodd gedauerd, unn de Schwoacher hodd als noch off sei Geld gewoart.

Owwer aamool,do kunnd de Hannjer sich nit vekasemaduggele, wej e sein Schwoacher hodd kumme sieh. Doo horren schunn voo weirem  begrießt unn horrem voom Werre geschwedzd  unn voom Vej. Wej e  doodenooch noch die Ernd  offs Dabehd brenge wolld, do esses  dem Schwoacher se bund worn, unn e horren  diregd nooch seim Geld gefreed. Doo hodd de Hannjer gedoddeld - e woor nehmlisch en Doddeler -:” Im d-dei G-Geld  b-b-brauchsde der k-k-kaa  G-Gedange se m-mache!”

Suu woorsch aach: De Schwoacher hot sisch goar kaa Gedangge mih drim se mache brauche. E hodds nehmlisch heud noch se kreje.

De Hennerhegger Bermoasder es emol bein Landroad en die Kreisschdoatt beschdelld worn. Jedzd hot owwer en dem Brief nit drenngeschdanne, worim. Es woor em goar kaan Kroom nit, unn do horre de Gemaarechner gefreed, was der da mache däd, wann er geruffe werrn däd. Unn der hodd gesaat:

“Das es woarscheinlisch weesche deem Waald, weesche dere Grenz, wuu die Vernerhegger doo Ooschbrisch oo usser Gemaa schdelle. Do sieh disch vier! Wann de desdeweesche bein Landroad beschdelld best, do musde schunn ebbes enn de Hand huu!” De Gemaareschener hott dodebei oo all dej aale Babiern gedoocht, dej offem Roares enn dene Schubloare gelee-e hunn. E hott geglaabt, de Bermoaster deht sisch jedzd droomache unn nooch Beweise ferr de Hennerhegger ihr reeschtmäsische Ooschbrisch suche. Owwer es koom ganz annerschd: De Hennerhegger Bermoasder hodd hie unn her iwwerleed, unn ze gourer Ledzd es em ebbes engefalle: E braucht dej aale Babiern goar nit mieh dorschsegugge! E hodd sein Mesdschubkerrn medgenumme, desse ebbes en de Hand hadd!

Wejs da freuer suu woar: De Parre, de Schullärre unn als aach de Ferschder woarn zwoar Reschbegdspersone, owwer se kunnde kaa gruuse Schbring mache unn mussde sieh wuu se bleiwe däre.

Do woar aach emool en Schullärre, der desdeweesche Biene gehalle hott.

Unn nadierlisch horre aach deene Kenn enn de Schul vezeelt, wej wischdisch die Biene sinn ferr die Naduur unn ferr die Bauern unn woas doas ferr lejwe Diernerscher weern. Aamool,  es woar en heise Doach , die Sunn hott gebrennt, was es Zeusch gehalle hott; do horre mett de Kenn die Biene dorschgenumme.

(Unn desses besser behalle deere, esse erscht noch emol off die Ammeise kumme, dej wu e die veerisch Woch meddene dorschgekaut hatt. Die Kenn mussdem saa, wej fleisisch dess die Ammeise weern. Unn doo horre daa die Brick zou seine lejwe Bienerscher geschlaa:)

Woas weern dej suu fleisisch unn deere sisch gejeseidisch helfe, unn oadisch weern se erscht reescht, unn die Kenn sellde sisch  doodroo e Beispiel numme.

(Se sellde nitt immer mett de Ranze offenanner schlaa, dess noor die Doafele kabuttgieh deere, wejs gestern erscht werre nooch de Schuul bassiert weer.)

Er hott sei Biene aach selwer suu gern gehott, dess kaans voo de Schulkenn ebbes geje se saa durft. Es  woar jedzd im die Middoachszeid unn e musd sisch eile, desse sei Dabeed noch dorschkroach oo dem Doach. Off aamool  koom sei Fraa enn die Schuulstubb gerennt unn hott gesaat, enn seim Goarde deht en Schwoarm Biene hänge, e selld sisch eile. Es woar suuwejsuu baal Schluss, doo horre de Kenn noch ordentlisch Offgoawe gewwe und hott se hammgejaht, unn daa esse selwer  hammgelaafe  unn hott sein Schleier gehollt unn en Kescher unn woas die Imger alles suu brauche, wannene en Schwoarm obgieh will. Owwer groad wej e sei Goardediersche offgemoacht hatt, doo es de Schwoarm aach offgestie-e unn schunn fort, unn mein Schullärre hennerher, wejwull e genaa wusd unn de Kenn schunn vezehlt hatt, en suu eme Fall weern Biene nitt mieh se halle. E hott jo eerscht noch geglaabt, e dät se kreje. E woar suu en Foahrt, desse gekresche hot: “Ei wu wollder daa hieh?“

(Ei bleibtdoch hej!” Unn daa: “Himmelnochenenn! Aisch brauch euch doch noch!”)

Owwer es hatt kaan Batt: Die Biene wollden nit veschdieh odder se kunnde kaa Deutsch nit unn sinn fort, hosde nit gesieh!

(Er als weirer hennedrenn, beagenunner, beagenoff ! Mein Schullärre woar suu auser Oarm, desse nimmih kunnt: E hott baal kaa Luft mih krejt, unn)

sein Schwoarm woar iwwer alle Beerje, unn de Honisch, wuu e hätt schbeeder voone ernde wolle, aach. Do hodden de Zorn iwwer sei lejwe Diernerscher gepackt, iwwer dej sonst kaans woas saa durft, unn e hott gekresche: “Flej hii, Miggegescherr!”

Wann Leut heuroade, daa doun se sisch enanner unn ferr alle Leut enn de Kersch verschbresche, dasse sisch immer treu sei wolle. Owwer wann daa e poor Joarn erim sinn, daa werd schunn alsemool vegesse, wos mer sisch veschbroche hot. Isch will hej nit innersuche, wuuher dess dej Vergesslischkeit kumme sei kinnt: Ob die Leut se wink se dou harre, ob se sisch gelangweilt hunn odder obs off aamool kaa gescheide Mannsleut unn aach Weibsleut nit mih goob? Mer waaß nor suu vill: Nooch e poor Joarn gibt's ere, dej fange oo, off die Joacht se gieh unn sedze ihrne Weibsleut ganze Geweie off; annern angele sisch aan unn lerne Anglerladein; werre annern finne ganz zoufällisch en Schatz unn vezehle Meernerscher wej ausem Buch. Aans hunn se all medenanner gemaa: Wuu en Wille ess, doo ess aach e Geleeschenheit dezou, ob em Haaschdock odder offem Huuchsitz, emm Schobbe odder em Keuschdall.

Suu woarsch aach kumme, dess e oarm Flischtlingsfraa off aamool kaa Sorje mih ims däschlisch Bruut huu braucht, unn doas woar joa nit mih wej reescht.

Die Hofnern hatt sisch e wink Milsch bei ihrer Nochberschen holle wolle, dej woar groad verheer en de Keuschdall gange. Owwer wej die Hofnern enn de Schdall koom, doo woar die Nochberschen nit beim Melge, wannse aach schweer geschafft hot meddem Nochber voo geesche-iwwer. Dej hunn alle zwaa geschdeehnt unn harre sisch halb ausgedoo, suu worm woarschene worn. Die Flischtlingsfraa wollt sisch vedrigge, owwer die Nochberschen hatt se schunn gesieh. Doo woarsch daa vebei mem Pläsier.

Die Hofnern hot gesaat, es dät er laad, unn wann se doas gewusst hätt, weer se nit erenkumme. Dej zwaa met dene uurowwische Innerleiwer hunnse oogefleht, desse nix weirersaa sellt, se deere se aach entschädische. Unn suu kooms aach. Die Hofern hatt em Keuschdall ihr Schlaraffeland gefunne. Wann se kinfdisch gern woas gehott hätt, woas se sisch eischentlisch nit leisde kunnt, daa braucht se nor bei aam voo dene zwaa oosedeude, wej schie es doch weer, wann ihr Kenn aamool die Woch e Schdick Flasch offem Disch härre, odder e poor Aajer. Se hätt schunn suu lang kaan Blummekohl mieh gesse, unn hej offem Ort kinnt mer joa aach kaan kaafe. Unn als suu weirer. Dej zwaa hunn se gout vesorscht. Desse doodebei alsemool em Waald odder en fremde Gärde odder Schdäll odder voo fremde Ägger woas hunn metgieh losse – wer wills ene vedeng-ge? Suu esses dehamm bei-ene nit offgefalle, woas se alles gewildert harre. Unn se sinn debei enn de Übung gebliwwe: Es ging als nor näwenaus. 

 Wej die aald Emile off die Ochdzisch ging unn nit mih goud gesieh hot, do es er ihrn Brell beim Koche als e wink treub worn, unn do hodd se sisch gewunnert: “Hm, hm! Das woor doch sonst nit su! Wos esses noor heud su newwelisch en de Kisch!” Das hunn ihr Enggelscher gehert unn hunn gesaat:”Ei Modder, weis us doch emol dein Brell!” No, unn do woarsch kloar wej Kluusbreu, worim die aalt Emmile nix mih gesieh hot: Es woarn lauder Miggeschiss unn Fett droff, dess merr baal nit mih dorschgugge kunnt. Unn wej da de Brell gebodzd woar, do hot die aalt Emmile gemehnt: “Na, das häddich wergelisch nit geglaabt, wu es daa all der Newwel hie?”

Dej Geschischd, dej jedzd kimmt, werd geweenlisch vo em Ort e wink weirer ewick vezehlt. Weil mir Mäuloffer owwer kaan Krumbel met annern Erder wolle, desdewesche hunn isch mer als Noome “Henner- unn Vernerhegge” enfalle losse, unn wer will, moach sisch woas debei deng-ge odder aach nit. Eischendlisch gibts iwwerall en de Welt Leut, iwwer dej mer lache kann,  do kann mer hiegieh wu mer will. Aich will misch selwer goar nit devoo ausnumme.

De Hennerhegger Bermoasder es emool en Sunndoach schbadziern gange  unn hott enn de Gemargung noom Reeschde gesieh. Do es em enns Aach geschbrunge, dess oom Weg nooch Vernerhegge ordendlisch vill  Beem gestonne hunn. Unn do es em werre enngefalle, des e en de Gemaakass e ganz schie Loch hatt unn des es ganz goud weer, wann e das Loch zou hätt. Unn wej e werre dehamm woor , do horre sich gleisch hiegesedzd unn  hodd e Oozaig oo des Amtbbläddsche vefassd unn hodd dej Beem inserierd.

No, unn wejs daa suweid wor, do koome aach  e Reih Leud unn hunn off dem Weg nooch Hennerhegge  gestonne unn hunn als gewoart, des de Bermoasder keem. Unn wej e daa ebeikoom, doo hodd en aaner voo dene Holzhännler gefreed, wuu daa dej Nussbeem weern, dej e en die Zaidung  gerickt hätt, unn hott gesaat: “Aich siehn doo nor Quedschebeem!”

“Jo!” hodd doo de Bermoasder werre gesaat. “Es sain Quedschebeem unn sunns aach bleiwe. Aich kunnd nor des laadse Q nit schreiwe!”

De Kall, Ihr wesst joa, der wu beim Deiwel en die Lehr goange woar, hatt es gruuse Luus gezuche: Sein Voadder hatt zwoar die ganz Huwwerick versoffe, owwer sein Pedder unn sei Geet wolldem ihr Geerschtsche iwwerschreiwe, weil se selwer kaa Kenn harre. Es ging joa noar im aa Kou, zwaa Gaase, zwaa Säu unn e poar Hinggel, oawwer doas woar besser wej nix. Die aale Engelsleut wollde de Mine ihrn Ellsde, weilder der Schlauste voo ihrne sechs Kenn woar - hunn se gemeent. Suu koom daa de Kall, wej e aus de Schul woar, met verzeh Joar nooch Mauloff.

De Engelsvoadder woar en Broure voo seiner Modder. Der woar Weißbenner, unn bei dem kunnt de Kall aach des Gewerb lerne ohne Lehrgeld se bezoale.Iwwerdem hott de Engelsvoadder sisch gout met Kreuder ausgekennt, unn aach doas hot de Kall vooem gelernt. Die Leut voom Ort sinn deerscht bei Engels goange, wannsene erjendwu wiegedoh hot. Su brauchdese nit de deuern Dokter se bezoale. Daa de aalt Engelsvodder hott nix fer sei Roatschläsch genumme, aach wann es gout hätt brauche kinne.

Die aalt Engelsmodder hunn die Leut baal jeden Doach gesieh beim Groasschneire oo de Wegränn, wu se met de Hewwischs Lina met de Sischel Foure geschnirre hot fer ihr derre Gaase, unn daa hott ses en de Kiez hammgetraa. Unn das auser oam Sunndoach Doach fer Doach su lang, wej drauß woas gewoachse ess.

Suu oajk woarn die Engels oos Schboarn geweent, dess die aalt Engelsmodder aach oom Esse geschboart hot: Die meerscht Bodder ess vekaaft woarn oo de Hock, unn desdeweesche esse dehamm nor dinn offs Bruud geschdresche woarn.

Nou owwer bein Kall: Der woar danze gewäst unn hatt off de Rillbäscher Kerb fleisisch die Marrerscher beim Walser dedreht, besunnersch die Emma, dej gout beinanner woar. Wej e do die Noacht noch hamm ess dorsch de Waald unn iwwer des Wissepädsche bes Mauloff, do harre off aamool en schiene Hunger. Unn weil’s medde en de Noacht woar, do horre gedoocht, es däten kaa Mensch hamkumme herrn, wanne nor leis genuch wer. Owwer wejs als su giet: Erscht essem de Hausdierschlissel erunnergefalle, daa hot die Hausdier gequiedscht unn daa noch die Kischedier. Owwer de Kall hatt suu en Gehhunger, e musst aafach ebbes esse. Do horre sisch aus de Dischschubload e Messer gegreffe unn ess demet enn des Kischekemmersche, hot sisch des Bruud ausem Bruudkasde gehollt unn e dick Scheib erunnergeschnirre unn woar groad debei, ordentlisch Bodder offs Bruud se schmiern – do hoare die aalt Engelsmodder kumme! E kunnt sisch schunn dengge, woas dej saa dät, wanne medde enn de Noacht woas esse wollt, unn nou aach noch die dick Bodder! E kunnt sisch nit veschdeggele, unn es goab aach kaa Hennerdier,wure enausgekunnt hätt, unn die Fensder woarn all huuch iwwer de Eer. Owwer es essem ebbes engefalle: E hot des Schdick Bruud erimgedreht, dess die dick Bodder deinnerscht woar, unn hot voo de anner Seit nochemol Bodder droffgemoacht, owwer nor ewink gekratzt. Die schboarsam Engelsmodder hot joa ewink gebrumbelt, oawwer es goob kaa Dunnerwerre! – Mer muss sisch nor se helfe wesse!

Des Settsche voo Aleweile hatt immer vill Eerwet. Nit dess die Eerwet schwer gewäse wer, owwer es woar vill, weil vier Mannsleud em Haus woarn unn noch e aalt Dande, dej nimmieh kunnt unn vesorschd wern musd, unn es Settsche woar die aanzisch Fraa em Haus, dej die Hauseerwet schaffe kunnt. Drim woar des Settsche bei allem immer e wink schbeet droo. Aach wanns ims Schwedze ging, musd des Settsche ebei, weil die Mannsleud des Maul nit offkrejt hunn unn die aalt Dande nimmieh alles rischdisch off die Reih gebroacht hott.

Su woarsch aach desmool. Des Settsche musd nooch Usinge offs Landroatsamt. Se wollt mem Milschaudo foarn. Do woar vornedrenn näwisch em Foarer noch aan Platz zoum Sitze, zor Nuut aach zwaa. Des Milschaudo koom immer off die Minuut, unn des Settsche woar  werre schbeet droo. Do hott se dem Bonsel, der wuu des Milschaudo gefoarn hot, aus em ewwerschde Schdock zougeruffe, se keem gleich, e meeschd noch e wink woarde. Do hatt se noch des Kobbduch off. Wej de Foarer die Kanne all henne off seim Lasdwoache hatt, do woar des Settsche schunn e Schdoggwerg dejfer, unn hott ausem negsde Fensder gekresche, e sellt nor noch en Aachebligg Geduld huu, se misst sisch noch ferdisch oodou.

De Bonsel wusst schunn voo freuer, desses beim Settsche mih wej aan Aachebligg dauern deht. E hatt aach gesieh, desse noch en de Kiddelscherz woar. Do horre de Modor ausgemoachd unn sisch e Sigarett oogeschdeggt. Wej dej owwer halb erim woar, do horre es erschde Mool gehupt. Jedzd woar des Settsche schunn Badärr. Es hatt aach des Koppduch obb, unn de Bonsel hot sisch gefreet, worim des Settsche schunn werre des Fensder offgerese hott unn geruffe hott, es keem gleich, alleweil däts gans gewess nimmieh lang dauern. Die Diehrn hunn geklappd, owwer des Settsche koom nit.   De Bonsel hot werre gehuupt. E kunnt jo nit wesse, dess des Settsche sei Korselett nit zoukrejt hott. E hott gehuupt unn gekresche, e dät jedzd foarn, enn de Molgerei dere se off die Milsch woarde. Daa horre des Audo oogelosse. Do ging die Hausdier off unn des Settsche koom erausgerennt  - met de Loggewiggel noch enn de Hoarn -  unn hatt sein Jack unn die Handasch enn de aa Hand, unn sei Perlonschdrimp unn sei Schou enn de annern. Auser Oarm esse näwisch de Foarer gekleddert, dodebei hott se gesaat: “Foar nor als! Schou unn Schdrimp doun isch noch em Audo oo!”   

Die Nelle harre en Wissboare Vewandtschaft, unn die aalt Emmil woar ganz schdolz droff, dess ihrm Mann sein Onggel doo Schullärre worrn woar. Desdeweesche dorft aach kaans voo de annern was saa, wann die Wissboarener em Summer als efdersch emol se Besuch kumme sinn unn sisch bei de Nelle dorschgefresse hunn. Die Emmile hot dann met de Wisboarener Huuchdeutsch geschwätzd unn die annern dorfde schbringge unn die Gesellschaft henne unn vorne bediene.

Doo es aamool dem Rischadd de Kroache gepladzd, wej die Wissboarener werre emool offen Samsdoach Middoach met ihrm neue Vauwee en de Hoop gefoarn sinn. Erschd hunn se meddem iwwers Wärre geschwedzd unn daa iwwer die vill Eerwet unn daa hunn se die Emmile begriesd

unn do ging de ganse Kroom voo vorne luus.Die Emmile es em Haus veschwunne unn hot schnell noch e wink enn de Kisch offgeroumd, unn de Rischadd es ooschdannshalwer bei de Wissboarener emm Hoop schdih gebliwwe unn hot meddene iwwer alles unn nix geschwedzd. Schließlisch horre de Bäsem krejt unn hott oogefange em Hoop se kehrn. Vegäwens! Des Leensche hot gesaat:”Wir wollten nur ein bißchen spazieren gehen bei dem schönen Wetter!” De Rischadd hot gemeent, se kinnde doch aach

ewink helfe bei der ville Eerwet. Beim Hajwenne dere se aach goar nit dreggisch wern. Die Wissboarener hunn nor gelachd unn hunn gesaat, das weer werggelisch en schiine Schbass, deen de Rischadd doo mache deet. Schließlisch hot die Tante Ella gefreet: “Was gibt es denn heute bei euch zu essen?” Doo hot de Rischadd gesaat: “Kadoffele, haaß unn ganz.” “Oh“, hot doo die Tante Ella gesaat, “dann gehen wir nicht so sehr weit und kommen zum Mittagessen wieder zurück. Wir können ja hinterher noch ein bißchen an die frische Luft gehen. Zum Kaffeetrinken sind wir dann bei Vinze, damit die uns nicht böse werden.” Ob dej Vinze bies gewäse weern wann se nit kumme weern ? Mer waaß es nit!

Suu sein se daa veschwunne, unn de Rischadd hot haamlisch en sisch enenn gegrient. De aalt Emmile horre nor gesaat, se sellt e poar mih Kadoffele quelle, die Wissboarener härre gefreet was es geeb unn wellde metesse. Dej hot sisch gewunnert, weil doch die Wissboarener sonst lejwer e gout Sopp unn e schii Schdick Broare gesse hunn, owwer se hot gemoacht, was de Rischadd gesaat hatt.

Wejs daa zwölf woar, sinn die digge Dande unn de derre Onggel pinktlisch enn de Hoop gewalzd unn daa enn die Kisch, wuu die Emmile die ganz Zeit ihr Enggelscher erimmgeschasst  unn schunn alles ferdisch hatt: Des besde Gescherr unn die feine Gäser unn e Flasch Waj offem Kischeschrank. Wejse da all im de gruuse Kischedisch erim gesesse huu, goobs Quellkadoffele unn Heering. Die Wissboarener hunn nor ganz wink voo all deem genumme, dess die Emmile sisch gewunnert hot. Doo hot die Tante Ella gesaat:”Nein, liebes Mielchen, es gibt ja hinterher noch Hase und Gans, davon wollen wir doch auch noch ein bißchen probieren.”

De Rischadd hot en sisch enenn gegrient, unn hot gesaat, e misd schnell emool en de Keuschdall, e hätt die Flora kreische herrn, woarscheinlisch dät se jedzd ihr Kalb kreje. Die Emmile hot e ganz Zeit lang gebrauchd, besse eraus hatt, wejs zou “dem Mißverständnis gekommen war”. Se hott sisch entschuldischd unn hot gemeent, e annermool sellde se doch lejwer sunndoachs kumme, do kinnde se sischer sei, desses Broare geeb.

Suu hunnses aach gemoachd. Se wollde jo emol dem Rischadd die Maanung saa, owwer do hunnse sisch da doch noch iwwerleet, dess se em das lejwer elaa saa wollde. Unn de Rischadd hoddene kaa Gelejenheid gewwe. Noochem Esse esse ens Feld gange, gugge, wej die Frischd schdiht - su horre gesaat - owwer dessene nit of ihrm zwaade Schbaziergang begeene däd, horre sich en die Scheuer ens Haa geleet un hot geschloofe. Derweil sein die Wissboarener bei Vinze gange, dej aach noch Vewandschaft woarn, unn hunn do all de Kuche fer de Sunndoach vedriggt, dess die Gerda nochemol bagge musst. Beleidischt woarn se nit: Su lang wej die Emmile noch kunnt, sinn die Wissboarener alle vier Woche kumme unn hunn sisch die Schnuut gedungkt.

Sperrd euer Uhrn off, ihr Leut, alleweil gibts ebbes se herrn aus dere Zeit, wu die Kersch unn die Schul unn des Roares noch em Ort woarn, unn de Ferschd, de Landroat, de Bermoasder, de Parre unn de Schullärre noch Reschbegtspersone, wu de Ferschd odder de Landroat weit fort woarn, wu en Bermoasder noch en de genälte Mestschou doherkumme kunnt, wu em Backes noch Feuer gemoacht woarn es, wuu des Frankforder Mennsche noch sei Foarroad de Finsderndäler Weg enoffgeschuubt hott unn die Mannsleut met de Heigowwel unn die Weibsleut mem Koarscht geschafft hunn,  die Aale dehamm oom Herd geschdonne odder of de Schnedzbank gesesse hunn, wej die Leut hej em Ort noch baal allmenanner Bauern woarn unn es kaum Dellefone unn Audos gob unn kaa Computer.

Ihr lejwe Leut, hej mei Geschichderscher  sinn baal all wergelisch suu bassiert wej isch se offgeschriwwe hunn. Dess sisch jedzd owwer kaans krank eerjert, hunn isch die Noome vo de Leud unn vo der Erder griesdedaals geännert. Ihr werd euch selwer nit werrefinne, aach nit, wann er selwer debei woart, unn su solls bleiwe.

Die eerschde Geschischderscher gihn iwwer die Bermoasder. Ganz freuer musd su en Bermoasder nit rischdisch schreiwe kunne. Owwer e musd kloar em Kopp sei unn reschene kunne unn schderg sei, desse zor Nut aachemol droffhaache hätt kunne. Nadierlisch woarn die Bermoasder nit all bei de Hellsde. Su woarsch aach zou dere Zeit.

Su en Landroat, saan die Leut heut, hotts schwer. Freuer woar doas alles vill besser: De Landroat kunnt mache, woas e wollt, die Leut hunn geglaabt, alles, woas e mache dät, wer woas Besunnersch, sugoar - owwer horscht selwer!

De Landroad es emool nooch Hennerhegge kumme, unn de Bermoasder  unn de Gemaareschener  unn die Gemaavedreder sinn meddem dorschs Ord gange unn hunn em alles gewisse unn vezeeld. Unn off aamool mussd de Landroat emol ausdreare unn do horre die annern e wink veergieh losse un hodd sich oo de negsde Mesd geschdelld unn hodd sei Geschäft erledischd. Die Lisbedd hodd hennerm Vorhang gelinsd, was de Landroad  da doo en ihrm Hoob mache dät, unn wejses gewoor worn es, doo hodd se gekresche: “Wos e Ehr, wos e Ehr! De Landroad hodd us enn Hoob gepisst!”